ХIетал-метал хаийла шуна:

Дитташ тIехула йедда лела,

Бабин бIаьраш цо идадо.

Маьхьарий хьоькхуш, тIулгаш кхуьйсуш,

Бераш цунна тIаьхьа уьду

                                          (Тарсал) 

ХIетал-метал хаийла шуна:

Шина лергах кхазайелла,

Мерах, бетах хьарчайелла,

Уьнах чIогIа ша ларйелла,

Хаал хьайна, хIун йу иза?

                                (БетамIаьжиг) 

ХIетал-метал хаийла шуна:

Дехачу Iаьно наб йо цо,

БIаьстенан йуьххьехь йолало.

Цкъа ца гинчунна бIабу го,

Лар гинариг кхерало…

                                   (Ча)

ХIетал-метал хаийла шуна:

Аганан гIожах тосуш йу,

Ага тахкош лесташ йу.

Гаки денна Iехош ду,

Алал хIинца и хIун йу?

                               (БицIаьлдиг) 

ХIетал-метал хаийла шуна:

ДIасахьокхуш тосу жарж,

Гомха у тIехь туьйсу кIеж.

Шера аре, шера у,

Цхьанхьа битац гома гу.

                                    (Воттана)

ХIетал-метал хаийла шуна:

Нанас аттера шура йоккху,

Цунах шортта тIо а боккху,

Алал йуьйург хIун пхьегIа йу?

                                        (Гиба) 

ХIетал-метал хаийла шуна:

Денош доца, буьйсанаш йеха,

Лергаш зийзош, куьйгаш дегош,

Самукъадаьлла ловзу бераш,

Алал, йуьйцург хIун хан йу?

                                             (Iа)

ХIетал-метал хаийла шуна:

Хьалдолчун а ду и дуьзна,

Мискачун и дац-кха делла,

И ше долахь дерг ву ирсе,

ГIайгIа йу и хилча деса.

                                       (Бохча)

ХIетал-метал хаийла шуна:

Шен дена ду и тешаме,

Ларвеш витац цхьа йуххе,

Ха деш лаьтта цIахь ца хилча,

Керт йуй хаьа шех тешна.

                                          (ЖIаьла)