Ахьмад-Хьаьжа – къоман баьчча
Схьадуьйла, схьагулло дадин бераш! Дика ладогIалаш соьга, бераш. Вайн къоман турпалхой а, истори а йевзаш хила дезаш ду шу. Вайн къоман турпалхо, вайн къоман баьчча, вайн къоман хьалхара паччахь мила хилла хаьий шуна?
И дера хилла Кадыров Ахьмад-Хьаьжа (Дала гIазот къобал дойла цуьнан). Буьрсачу цу тIамах а, йамартчу мостагIех а нохчийн халкъ хьалха даьккхина цо. Даймохк бара мохь орцанца кхойкхуш, ненан мотт бара чевнаш хилла боьлхуш. Дайн хIусамаш йара отуш, йагош. Наной бара доьзалех къаьстина, иштта дара дайх-нанойх къаьстина буобераш. Сийначу цIарах йогуш йара Нана-Нохчийчоь. Цу халачу муьрехь, дерриге а дукъ шена тIелаьцна, майра гIеттира къонах Кадыров Ахьмад-Хьаьжа. Цо шена хьалха Iалашо хIоттийра шен халкъана, махкана чевнаш ца хилийта, кхин берийн, зударийн, баккхийчу нехан цIий ца Iанадайта.
Ахьмад-Хьаьжин хIора дош дара гIиллакхе а, оьзда а, кIорггера чулацам болуш, хьекъале а, говза а. Кхечу къаьмнашна санна даха, говза, хьекъал долуш а, нохчийн къам дуй хаийтира цо. Нохчийн халкъ, мохк цхьанна дега хьийза дойтур долуш вацара, йа цу заманахь федералашка а, йа цхьана а зуламхошка а. Иза вайн къам паргIат даккха, вайна тIехь кхин и тайпа харцо ца лелайта, АллахI Дала векал вина, даржехь нисвина, Къонах вара. Цу халачу муьрехь мила вара шен сан ца дезаш, шен сан ца дадош? ХIора а вара шен сан дадийна лелаш. Ткъа Ахьмад-Хьаьжас, шен къоманна а, шен Даймахкана а, шен са ца кхоийра. ХIинца а масане хир бара, эзарнашкахь наной боьлхуш, Даймахкана йеш хира йара дера чевнаш. Ткъа цо: «ХIан-хIа, кхин хьийзор бац сан мохк, сан халкъ», – аьлла, харцо эшийна, бакъо толийра. Вайн йарташ, шахьарш йу де-дийне мел дели а маьршачу дахарехь серлайуьйлуш. Тайп-тайпанчу белхийн шортта меттигаш йу, дуьне даларх лур йоцуш дешаран хьукматаш йу, бIеннашкахь больницаш, маьждигаш. ХIора баттахь, шен-шен хенахь алапа ду луш, иштта пенсеш ду, неI, кор ца къовлуш, паргIата дIадийша йиш йу. Ахьмад-Хьаьжин беркат ду иза. Даима адамийн дегнашкахь вехар ву вайн къоман турпалхо, баьчча, хьалхара паччахь – Кадыров Ахьмад-Хьаьжа. Цкъа а виц вийр вац халкъо, Даймахко шен мехкан турпалхо, баьчча, хьалхара паччахь Кадыров Ахьмад-Хьаьжа.
